1410. Juni 24. Czarnowanz

In nomine domini Amen. Sub Anno Nativitatis eiusdem Millesimo Quadringentesimo decimo Indiccione tercia vicesimaquarta die mensis Junii, hora terciarum In monasterio Sanctimonialium Domusdei alias Tscharnowans Wrat. Dioc. In domo communi sive Capitulari, Pontificatus Sanctissimi in Cristo patris ac domini nostri domini Johannis divina providencia pape vicesimitercii anno primo In mei Notarii Publici testiumque subscriptorum ad hoc vocatorum specialiter et rogatorum presencia Constitute personaliter Honorande et religiose domme Philomena Priorissa, Bronyslawa Subpriorissa, Offka Circatrix, Anna Cantrix, Offka Succentrix, Barbara Custrix, Margaretha Subcustrix, Elizabeth Kandzerawka, Agnes Swirtzowna, Anna Korzecwicza, Heschka de Odra, Margaretha Korzecwicza, Elizabeth Ogonyk, Katherina de Newodnyk, Agnes Pnyowska, Dorothea Advocati, Sophia Lassotzanka, Hedwigis Preczlai, totusque Conventus Sanctimonialium Monasterii Domusdei antedicti Ord. Prem. Ad sonum Campane ut moris est in eorum Capitulo propter infrascripta facienda capitulariter congregate, solacio pastoris destitute, Juxta statuta et consuetudines suas Ac propter decessum felicis memorie domini Nicolai Stercz olim prepositi Monasterii sui, consulentes animabus suis et Ne bona sua temporalia gravius discerperentur, omni meliori modo via et forma quibus potuerunt unanimi et concordi voce sollempniter elegerunt ordinaverunt et acceptaverunt Honorabilem et Religiosum virum fratrem Petrum Borg, professum Monasterii sancti Vincencii extra muros Wrat. dicti ord. Prem, ipsarum prepositum, provisorem, pastorem gubernatorem et Rectorem. Petentes Venerabilem in Cristo patrem d. Andream miseracione divina Abbatem Monasterii S. Vincencii extra muros Wrat. prefati Patrem Abbatem suum durante scismate pestifero, Quatenus huiusmodi eleccionem ordinacionem et acceptacionem ratam gratam atque firmam habere dignetur, Ipsamque elec-cionem annuat consenciat et confirmet, Et ut una cum eis Reverendo in Cristo patri ac domino d. Wenceslao Ep. Wrat. aut eius in spiritualibus et temporalibus vicariis supplicet humiliter et devote, quatenus dictum dominum Petrum Borg, Ipsarum electum habilem et ydoneum pure propter deum ad eandem preposituram investire dignetur, Curam sibi in spiritualibus et temporalibus graciose committendo. In quorum omnium et singulorum fidem et testimonium premissorum presentes litteras seu presens publicum Instrumentum per me Notarium publicum infrascriptum scribi et publicari pecierunt, sui quoque seu Conventus sui Sigilli appensione communiri. Actum et Datum Anno Ind. die mense hora loco et Pont. quibus supra Presentibus Honorabilibus viris dominis Nicolao de Marschowicz Custode, Magistro Bernhardo de Granowicz Canonico Ecclesie collegiate sancte Crucis Opo¬liensis Necnon Religiosis viris dominis et fratribus Paulo de Nysa Circatore, Jacobo de Parchewicz Subcustode et professis Monasterii sancti Vincencii supradicti, Et Mathia Creydil Priore dicti Monasterii Domusdei alias Tscharnowans Wrat. dioc. supradicte testibus ad premissa vocatis specialiter et rogatis.
Et ego Johannes quondam Martini de Schenewicz etc.

Aus dem Archiv von S. Vincenz. Anhangend das Siegel in hellem Wachs, elliptisch geformt; es stellt eine thronende Mutter Gottes dar mit der Umschrift: SIGILLVM ECCLESIE . . . . . . . . .

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.